News & Notice

भोजपुर (१ कार्तिक)/त्रिभुवन विश्वविद्यालयको आङ्गिक क्याम्पसको रुपमा रहेको भोजपुर बहुमुखी क्याम्पस, भोजपुरले पहिलो पटक क्याम्पस परिसरमा नागरिक वडापत्र राखेको छ । त्रिभुवन विश्वविद्यालय अन्तरगतका ६० वटा आङ्गिक क्याम्पसहरुमध्ये नागरिक वडापत्र राख्ने भोजपुर बहुमुखी क्याम्पस पहिलो क्याम्पस बनेको छ । नागरिक वडापत्र बमोजिम सेवा प्रवाहमा क्याम्पस प्रशासन प्रतिबद्ध रहेको निमित्त क्याम्पस प्रमुख उत्तमसिंह राईले बताउनु भयो । 

सुशासनको प्रत्याभूति गर्ने सम्बन्धमा बनेको सुशासन (व्यवस्थापन तथा सञ्चालन) ऐन २०६४ को दफा २५ मा नागरिक वडापत्र राख्नु पर्ने प्रावधान उल्लेख रहेको छ । ऐनको उक्त दफाले सर्बसाधारणलाई सेवा प्रदान गर्ने वा जनसम्पर्क कायम गर्ने प्रत्येक सरकारी कार्यालयले सबैले देख्ने ठाउँमा नागरिक वडापत्र अनिवार्य राख्नुपर्ने बाध्यात्मक कानुनी व्यवस्था गरेको हो । गत वर्षदेखि नै क्याम्पस परिसरमा सुशासन ऐन २०६४ को दफा ३१ बमोजिम उजुरी पेटिका राखिएको र विद्यार्थीहरुको सहयोगको लागि हेल्प डेक्सको स्थापना गरी सुशासनका लागि प्रयास भइरहेको क्याम्पसका सूचना अधिकारी नोदनाथ त्रितालले बताउनु भयो ।